هل المجتمع المصري مجتمع عنصري ؟!

الفتره اللي فاتت عانت أكبر دول العالم _أمريكا_ من عنصرية تعرض ليها راجل أسود أدت لموته ، ومع زيادة الكلام عن العنصرية والتنمر تفتكر هل من حقنا نسأل إن مجتمع زيّ المجتمع المصري يعتبر مجتمع عنصري وله لأ ؟!

بعد تعرض دينا الشربيني وزوجة آسر ياسين وإبنة هشام سليم _العابره إلى ذكر_ والمطرب رامي جمال المصاب بمرض بالبهاق وأخت الفنان محمد رمضان وأخيراً بنات الفنان شريف منير لأحداث تنمر وعنصرية بأشكال مختلفه ، بقا من حقنا نسأل هل المجتمع المصري يعتبر مجتمع عنصري وله لأ ؟!

مبدئياً تقدر تقيس تحضر أى مجتمع بإنك تراقب الناس اللى بيكونوا المجتمع ده بيبصوا لبعض إزاى ،
الموضوع بيتعدى الكلام عن التخن والرفع والطول واللون ،
التصنيف له مقاييس كتير تانيه .. احنا مبدعين فى عنصريتنا الحقيقه ،
أهل المدن بيقولوا كلمة ” فلاح ” كشتيمه ،
والفلاحين يقولوا البنت دى عامله زى بنات مصر .. برضو كشتيمه ،
كل مصر بتشوف النوبيين انهم مش تبعنا عشان سود
، والنوبيين يقولوا على بقية مصر ” جرباتيه- غربا يعنى – أو فلاحين ” ،
معظم الأغنياء بيشوفوا الغلابه جرابيع وبلطجيه
” مره دخلت بعربيتى حى شعبى والناس قعدت تبصلى بصات غريبه وكنت قافله ازاز العربيه طبعا بس كنت خايفه منهم موووووت ” … كلنا سمعنا جمله زى دى ،

والغلابه بيشوفوا ان الاغنياء دول حراميه .. أى شاب صغير راكب عربيه حلوه يبقا أمه هى اللى جايبهاله .. وأكيد من فلوس حرام يعنى ،
المتعلم فى جامعه اجنبيه يبقا ” واد سيس ” ،
واللى معاه دبلوم أو دخل معهد يبقا ” بيئه ” ،
أى حد بشعر طويل يبقا ” اشتراكى ” ،
وأى حد بدقن متطرف فى الدين أو ارهابى ،

بس على فكره العيل السيس اللى راكب عربيه حلوه ده بيصحى من نومه الساعه 6 الصبح عشان يوصل شغله الساعه 7.30 ويقعد على مكتبه ويشتغل لمدة 12 ساعه وغالبا أقساط العربيه قاسمه وسطه ،
والجرابيع اللى بتقول عليهم دول هما اللى بيلموا زبالة حضرتك .. وبيصلحوا جلدة حنفية حضرتك .. وبيسفلتوا الشارع اللى بتمشى عليه عربية حضرتك ويصلحوها لو باظت ،

والمتعلمين السيس دول هما اللى بيشغلوا البنوك والبورصه والإتصالات والمستشفيات .. وبيفتحوا شركات ومصانع وفنادق اللى بتشغل ناس غلابه زى حضرتك ..
ودول بيدفعوا ضرايب اكتر من حضرتك .. ضرايب من غيرها الدوله تفلس ..
وعلى فكره برضو اللى لابس شورت مش فرفور .. ده حران بس ،
والبنت المحجبه مش شرط تكون دماغها مقفوله ،
واللى مش محجبه مش شرط انها مش عارفه ربنا ،
والسلاسل والحاجات اللى بتتلبس ف الايد ملهاش علاقه بالرجوله إطلاقا ،
و ” المطلقه ” مش شتيمه خالص ولا عيب … واحده اتجوزت بشرع ربنا ولقت نفسها مش مبسوطه واختارت غلط مثلا راحت انفصلت .. ايه المشكله يعنى ؟؟!!

الناس اللى عايشين معاك دول هما ” ولاد بلدك ” وقبل كده هما ” بنى آدمين ” زيهم زيك .

نار التنمر والعنصرية ممكن تؤدي لدمار بلد بحالها ، وأكبر نموذج حيّ شوفناه بعنينا خلال الفتره اللي فاتت في أمريكا ، واللي هي أكبر دول العالم مش مجرد دولة عاديه .

سيبوكو بقا من ” سيس و فلاح و صايعه ومعقده و كفتس و خنفس وبيئه و أوزعه وكرته وعانس ومطلقه ” .